F.R.I.E.N.D.S
 عدد الرسائل : 22
العمل/الترفيه : للأســـــــف طــــــــــالب
المزاج : :) كووووووول على طووووول :)
تاريخ التسجيل : 23/09/2008
 | موضوع: :) قـــــزيـــــــزة المطــــــاعــمـ :)  الثلاثاء سبتمبر 23, 2008 4:02 pm | |
| بالكويت , المطاعم هي الملاذ الوحيد لـ كل شاب طموح ! ..
وشي طبيعي في أنواع دايما تتردد عالمطاعم ..
عشان جذي , هذا موضوع يلخص أنواع قزيزة المطاعم !
وراح يكون في أجزاء
اول جزء مطاعم البحر
Lenotre .....!
قزيزة لينوتر ذربين حدهم ..
تلقون واحد عازم مرته توهم مالجين وما يبي مكان فيه زحمة ,
فـ ماخذين طاولة بروحهم وشابين لهم شمعه وكل واحد مستحي من الثاني ,
ويوزعون إبتسامات ..
واخر شي يقولها عمري تبين تحلين ؟
تقوله لا حبيبي عادي ..
يقولها امبله حبيبتي انا قايليلي عن كيكة وايد حلوه هني والكيكه لازم تاكل كيكه ..
عصافير عصافير الله يتمم عليهم ..
ولا يمعة عيايز كل وحده قاصه الشعر شكل ,
إلي بوي إلي بف إلي كيرلي ! ..
وكل وحده لون .. إلي صابغته أحمر ,
إلي أشقر , وإلي أسود مخصلته بـ عسلي @@
وطالبين لهم طلب قبيله كامله ..
وسوالفهم إما عن الانتخابات أو عن الجمعيات النسائيه ..
وحزة الريوق تلقى 5 بنات متحجبااات مزرقين من الدوام ويايين يتريقون ..
~~
Nino .....!
الشباب إلي دايما يترددون على نينو ...... عنده القفل والسكسوكه أهم من دراسته !
اذا صار يوم الثلاثه بالليل .. لازم يروح يحلق قبل لا يطلع ..
لان عز قز نينو يوم الثلاثه ..
فـ تلقى بالايام العاديه عادي ديرتي , ولا داق الشنب ولا اي شي !
بس اذا بيروح نينو لازم قفل !
حتى لو كان إمّلط قبلها , يرسمله قفل !
تلقاه طول الاسبوع لي قلتله خنروح نينو ,
يقولك ويييييع ! الله يزيد النعمه .. ماكو شي حلو ينوكل هناك !
بس يصير يوم الثلاثه !!! يالله شباب نينو اليوم ..
انزين توه مو عاجبك !
يرد عليك بنظره , يبه عز القز اليوم !
ولي خلص القز وطلع من نينو ..
يقول حق الشباب , خنروح ماكدونالدز باخذ تيك أوي ما كليت شي بنينو !
أما البنات طبعا عندها نينو = معزومه على عرس ..
لازم فل ميك أب ! تضيع بدون الميك أب .....
تقول , شلون شلون شباب نينو كل واحد احلى من الثاني قفل ومغتر يشوفوني مهلقه أو بدون ميك أب !
طبعا تروح هناك تطلب سيزر سالاد , وتاكل خستين من السلطه وتقزرها باجي الوقت رايحه راده عالحمام تظبط روحها !
هذا كله بـ حزة ويك أند طبعا .....
بايام الدوام ,
بس طاولتين الي فيهم حياة , باجي المطعم يصفر ولا ذبانه فيه !
~~
Chilis .....!
وانا قاعد أصور هالصوره , كانت الساعه 8 الصبح ..
............ياني الحارس المصري جان يقولي فيه إيه ؟ شايفك بتصور ؟! جان اقوله إي راح أكتب فيكم تقرير يوديكم ورا الشمس !
شيليز جميع الأنواع تتردد عليه ..
بدايه بـ فئة الشباب الكول ,
إلي كل واحد سافط موتره بره !
وتلقاهم قروب بس كل واحد ياي بسيارته عشان يقز فيها !
ونظام ها بو حمود شهالشوته إلي مركبها عاليوكن !
ها بو شهاب ظبطنا بـ الرنجات , ها بوعلوه مركب سستم قزوز عالتاهو !
والفئة الثانيه فئة المراهقين ..
إلي تلقى شنبه ليلحين ما طلع ويغازل بالجمعيات !
والبنات لي لحقها واحد تخاف , بس من يلحقها واحد من هالطقه تطلع قوتها عليه !
تقوله هييييييه بابا انا كبر امك !
عاد اهو يتحبط ويروح !
المهم هالنوعيه دايما يكونون يايين مع السايق ...
فـ مخلي السايق ينطره بره على ما يخلص عشاه أو غداه ..
ومسكين السايق تلقاه قاعد عالواجهه البحريه ينطر ..
ونظام سوالفهم ها حموود شفت رونالدينيو أمس ! حده بدع الـ ....... ' سبه ' !
و إي صلوووح ولك أمس طافتك حلقة ستار أكادمي في وحده حدها موصج' !
اي جسووووم طافك أمس رقمت وحده حدها مو صج !
ونظامهم كله يطلبون Taxes Fries !
أما الفئة الثالثه , فئة الموظفين !
تلقونه ياي مشتهي أكله معينه ومسطل عليها من الدوام !
ناطر بس يخلص الدوام ويتل واحد من ربعه بس عشان يروح ياكل من شيليز !!!
وتلقونه مجفس جموم الدشداشه من قبل لا يدش المطعم ......
وسوالفهم عالطاوله إي بو ضاري تصدق بيزيدون الرواتب !
بوسلمان : لا يبه خبرك عتيج هونوا .. ولا شرايك بو بدر ؟
بوبدر : عطني بطل الكتشب اقول !!
الفئة الرابعه , فئة بنات الكليات !
هذيل نظامهم إيوون قروب , عالساعه 4 ونص 5 ...
وكل وحده نظاره شمسيه وستايلها عايشه المرطه إلي كشه والنظاره سوده !
وماكو شمس أصلا ,
ونظام ترينق Dior وثلاث ألوان ما يتغيرون ! فوشي , بنفسجي , أحمر !
غير هالالوان تصير هلاقه !
ويطلبون أكلهم وما يفصخون النظاره الشمسيه ..
ياكلون وهم لابسين النظاره !
ولما يحسون لأ خلاص الوضع صار Over ظلمه !
يفصخونها , ولا الويه ولا نقطة ميك أب ! جنهم العيدروسي بس بدون سكسوكه ...
ولي بغوا يسولفون ......
منوووور يبتي نوت محاضره دكتور الانثروبولوجيا ؟
منور : وي نسيته عند فروح ..
فروح : امبيه نسيته عند وضوح ..
وضوح : وي جان ذكرتوني من قبل , نسيته عند سارو ..
سارو : يعلكم الويعه ما تقولولي من قبل ! خليتوني انساه عن فجور !
فجور : ترا هم انا نسيته عند مريوم ..
مريوم : ....... الخ !
كلهم بـ نوت واحد , ومن كثرهم لو يسون إنقلاب بالديره عادي يمسكون الحكم ..
وقبل لا يطلعون من المطعم لازم يصورون بعض ..
أما الفئة الخامسه , فئة الوافدين !
نظام عايلتين تتكون من ريالين وبنتين ويايبين ثمنتعش ياهل ! وكل اليهال يتشابهون ..
ما تدري هذا ولد منو ؟! جنهم ملقطينهم من مجله ..
عاد تلقى كل واحد فيهم يشتغل بـ بمكان محترم ,
إلي بشركة كمبيوتر , وإلي بوكالة سيارات مدير مبيعات ..
وتلقى سويج البرادو واللانسر عالطاوله .. والموبايل لازم يكون مغطى بـ يلد ومحطوط عالحزام ..
ولي حجو ....
أبو مازن : لك شو أولك أبو مصطفى , بيؤولوا بونك بوبيان كتير منيح وبيعطي فوايد للي بيفتحوا عندون ؟ ....
أبو مصطفى : والله مابعرف شو بدي أئول , انا بستسمر أموالي في بونك الوطني , كتير عاجبني شعار الكاميل !
أخر فئة , فئة المنقبات !
مسكينه تلقاها تتلفت ساعه إلا ربع عشان ترفع النقاب وتاكل لقمه ! ..
ما يسوى عليها يايه مطعم , الاكل يبرد وإهي تتلفت ! لو ما خذته تيك أوي أحسن ..
ولي خلصوا أكل المفروض يطلبون حلو ...
هذيل طلعوا حب أبيض وشمسي وقعدوا ياكلون ويسولفون !
وسوالفهم ... إي يا ام عبدالله وليدي حمود ياب اربع نقاط بالثانويه ونجح سملله عليه ..
ام عبدالله : اي والله حتى انا وليدي نجح وياب اربع نقاط .. يستاهلون سفره العمره هالسنه
هذي أغلب الفئات ,
لكن وقت العشى بالويك أند يختلف الوضع ....
أنواع السبايكي تلقاها هناك ! كل واحد يتحدى صاحبه بطول الشعر ..
ومن جانب أخر كل وحده تتحدى رفيجتها بالحجاب ! أي واحد يوصل السقف قبل أهو الفايز ..
ماادري منو قايلهم إنه المطعم مسوي مسابقة إلي يوصل للسقف أول ياخذ وجبه غداء مفتوحه لـ شخصين !
~~
Hard Rock .....!
الفئة الأولى : بنيه فاله الشعر لابسه جينز وبدي وشكلها عادي ...
ومعاها شخص شعره قصير حيل ومسويه سبايكي .. وماسك البوك والموبايل بإيده !
ولابس بولو وجينز ..
ولي دققت شوي ولا تكتشف إنهم ثنتينهم بنات !
الفئة الثانيه : 4 الشعر كله جل , ومسوينه نفس نوال بـ ألبوم الشوق جابك !
لي مروا يمك الريحة شانيل ولا اي عطر نسائي يديد !
والموبايل سامسونج فوشي ! وعليه ستراس من وره ..
البوك قوتشي ! الساعه قوتشي .. الجوتي قوتشي .. الحزام قوتشي !
المشيه تقول إنهم بنات ......
الجتوف واللحيه الخفيفه إلي طالعه ! تقول إنهم شباب ..
الشرع شيقول ؟ الله اعلم !
الفئه الثالثه : 2 أمريكان منغشين بالأسم ! أول ما يدشون .. Two Beers Please !
عاد ينصدمون من الوضع !
ويطلبون لهم شراب شعير من غير كحول ويحاولون يتخيلونه إنه نبيذ !
~~
Naief .....!
قزيزة هالمطعم فئتين لا ثالث لهما ..
الأولى : إخوانا الوافدين ! ..
الثانيه : بما إنه يم مطعم نايف ملعب صابون , والشباب بالصيف كل يوم هناك ..
فـ يدشون يمعة شباب فوق الـ 10 المطعم ..
كل واحد فنيله نص جم وشورت وكل ما فيهم مبلل !
جنهم غرقانين ..
وحاطين الفوطه عالجتف !!!
عاد واقف لهم مصري بره .. يقولوه نبي حمام !!
يقولهم يفندم ممنوع إستخدام الحمام إلا لـ رواد المطعم !
يقولوله إشفيك إنت بندش الحمام وعقب نطلب أكل ..
يدشون كلهم الحمام يغسلون وينشفون روحهم ..
ويطلعون من المطعم بدون ما يطلبون !!!!
ويكتفي المطعم بالوافدين المخلصين إلي قاعدين جبال التلفزيون الكبير وقاعدين يطالعون روتانا !
~~
The Burger Hub .....!
رواد هالمطعم أغلبهم طلبة الجامعة ,
ليش ما ادري ! ...
عاد ما تسمع إلا هالحوار ,
المستقله قاعده تستغفلكم ! وانتو تصوتون لها .. " احم احم شفيها المستقله " p;
ويرد عليه صاحبه : يا معود الحين شدعوه الهندسيه مقصرين ..
ليلحين ما خدموا الطالب بشي ! ..الخ
~~
McDonalds.....!
يتيمعون شباب بـ مارينا يوم الخميس الساعه 6 ..
يفترون المجمع كله ! وعقب يروحون المطاعم إلي فوق ياخذون فره ويلحقون بنات ..
عقب يروحون Game Network يلعبون ,
ولما إتيي حزة العشى ,
يالله يا جماعه ماكدونالدز البحر !
من الأسباب إلي تخليهم يروحون ماكدونالدز البحر ......
كل واحد أبوه معطيه 5 دنانير وقايله هذا مصروفك مال الويك أند ..
فـ يكونون صارفين دينارين بـ Game Network والباجي يروحون يتعشون فيه بـ ماكدونالدز !
وأكبر واحد فيهم , يكون بـ ثانية ثانوي !
ويكون أهو قائد القروب !
أو فئة ثانيه , يكونون توهم متوظفين ..
اما بنات أو شباب ,
يكون نص الشهر والمعاش طاير وعايشين بحالة تقشف ..
وبنفس الوقت ودهم يطلعون يتعشون بره !
فـ يختارون ماكدونالدز البحر , منه أكل حلو ومنه سعر توفير !
ولي خذوا معاش الشهر الياي , يروحون لينوتر !
~~
يــــــــــتبــع ... | |
|
F.R.I.E.N.D.S
عدد الرسائل : 22
العمل/الترفيه : للأســـــــف طــــــــــالب
المزاج : :) كووووووول على طووووول :)
تاريخ التسجيل : 23/09/2008
| |
????
زائر
| | موضوع: رد: :) قـــــزيـــــــزة المطــــــاعــمـ :) الأربعاء سبتمبر 24, 2008 3:38 am | |
| مشكوووووور اخوي على الموضوع المبدع و اتمنى المزيد من مشاركاتك الجميلة |
|
F.R.I.E.N.D.S
عدد الرسائل : 22
العمل/الترفيه : للأســـــــف طــــــــــالب
المزاج : :) كووووووول على طووووول :)
تاريخ التسجيل : 23/09/2008
| | موضوع: رد: :) قـــــزيـــــــزة المطــــــاعــمـ :) الأربعاء سبتمبر 24, 2008 10:44 am | |
| | |
|
q8_7bob
عدد الرسائل : 32
العمل/الترفيه : طالب متفوق بثنوي
تاريخ التسجيل : 25/09/2008
| | موضوع: رد: :) قـــــزيـــــــزة المطــــــاعــمـ :) الخميس سبتمبر 25, 2008 4:08 am | |
| مشكووور اخوي على الموضووع | |
|
